पुसदच्या शिरपेचात मानाचा तुरा; डॉ.प्रिया शेजुळेची गरूड झेप इस्रोत संशोधन शास्त्रज्ञ पदी निवड!
पुसद : शहरातील रहीवासी असलेल्या डॉ. प्रिया शेजुळे यांची इंडियन रिसर्च सेंटर (इस्रो) मध्ये संशोधन शास्त्र म्हणून निवड झाली आहे त्यामुळे पुसद शहराच्या शिरपेच्यात मानाचा तुरा रोवल्या गेला आहे.
त्याच अनुषंगाने शहरातील विविध सामाजिक संघटना व राजकीय संघटना त्यामध्ये भीम टायगर सेना, वंचित बहुजन आघाडी आणि भारतीय बौद्ध महासभा यांच्या संयुक्त विद्यमाने डॉ. प्रिया शेजुळे यांची ढोल-ताशांच्या गजरात भव्य मिरवणूक काढण्यात आली होती.
या कार्यक्रमाचे नेतृत्व किशोर कांबळे (जिल्हाध्यक्ष – भीम टायगर सेना), बुद्धरत्न भालेराव (तालुकाध्यक्ष – वंचित बहुजन आघाडी), भारत कांबळे (तालुकाध्यक्ष – भारतीय बौद्ध महासभा), कृष्णा जाधव (एमआयएम जिल्हा संघटक) यांनी केले.सकाळी ११ वाजता छत्रपती शिवाजी महाराज चौक येथून रॅलीला सुरुवात झाली. ओपन जिप्सीमधून डॉ. प्रिया शेजुळे यांचा सत्कार करण्यात आला. ढोल-ताशांच्या गजरात व पायदळ मिरवणुकीसह रॅली महामानव डॉ. बाबासाहेब आंबेडकर चौक येथे पोहोचली. तेथे छत्रपती शिवाजी महाराजांना हार अर्पण आणि डॉ. बाबासाहेब आंबेडकरांना पुष्पहार अर्पण करून घोषणाबाजी करत कार्यक्रमाची सांगता झाली.
या कार्यक्रमाच्या वेळी डॉ. प्रिया शेजुळे यांचे विचार व्यक्त केले की आज मी जे काही आहे ते माझ्या कुटुंबीय, शिक्षक आणि समाजाच्या प्रेरणेने. पण यामागे सर्वात मोठा वाटा महामानव डॉ. बाबासाहेब आंबेडकरांचा आहे. त्यांनी दिलेल्या शिक्षणाच्या अधिकारामुळे आणि विज्ञानाकडे नेलेल्या प्रगत दृष्टीकोनामुळेच माझा प्रवास शक्य झाला. भावी पिढ्यांनी डॉ. बाबासाहेबांच्या विचारांना बळ देत विज्ञान-तंत्रज्ञानाच्या क्षेत्रात धाडसाने पुढे यावे, अशी अपेक्षा व्यक्त केली” या कार्यक्रमानंतर विविध पत्रकारांनी डॉ. प्रिया शेजुळे यांची मुलाखत घेतली. त्यांनी विज्ञान-तंत्रज्ञानाच्या क्षेत्रात ग्रामीण भागातील विद्यार्थ्यांनी मोठ्या प्रमाणावर सहभाग घ्यावा, असे आवाहन केले.डॉ. प्रिया शेजुळे यांच्या या अभूतपूर्व यशामुळे पुसद शहरासह संपूर्ण यवतमाळ जिल्ह्याच्या मानाचा तुरा रोवला गेला आहे. तरुणाईसमोर नवा आदर्श निर्माण झाला असून रॅलीत सहभागी नागरिकांनी या यशाचा उत्स्फूर्त आनंद साजरा केला.
