पुसद शहरातील जनतेच्या विश्वासाला तडा जाऊ देणार नाही स्टॅम्प पेपरवर दिला जाहीरनामा!
पुसद: नगरपरिषद निवडणुकीत प्रचाराचा माहोल एका नव्या उंचीवर पोहोचला असून शिवसेना शिंदे गटाच्या नगराध्यक्ष पदाचे उमेदवार अनिल ठाकूर यांच्या दमदार प्रचार मोहीमेने व स्टॅम्प पेपर वर घोषणापत्र जाहीर केल्याने शहरात चांगलीच चर्चा रंगली आहे. गेल्या अनेक वर्षांपासून प्रस्थापित सत्ताधाऱ्यांच्या घराणेशाहीला तसेच टक्केवारी घेऊन निकृष्ट दर्जाचे कामे केल्यामुळे शहरातील विकासाला खीळ बसली असून या शहराला ५० वर्षे मागे लोटल्याने शहराचा विकास संपूर्ण खुंटला आहे. सत्तेची महत्वकांक्षा असलेल्यांना या शहरातील जनता कंटाळली असून येत्या काळात शहराचा चेहरामोहरा बदलणार असून येणाऱ्या काळात शहराच्या शाश्वत विकासासाठी मला आशिर्वाद द्यावे असे आवाहन मतदारांना पत्रकार परिषदेच्या माध्यमातून अनिल ठाकूर यांनी केले आहे.पुसद नगरपरिषद निवडणुकीच्या पार्श्वभूमीवर शंभर मुद्यांचे घोषणापत्र प्रसिध्द करुन त्यातील वचननाम्यातील सर्व मुद्यांची पुर्तता करणार व शहराला भ्रष्टाचारमुक्त प्रशासन, सर्वागिण विकास व हिंदवी स्वराज्य व्यवस्था देण्यासाठी वचनबध्द आहे. शिवसेना शिंदे गटाकडुन मी नगराध्यक्ष पदासाठी उभा आहे. पुसद शहर स्वच्छ व सुंदर बनविण्यासाठी वचनबध्द आहे. त्यासाठी जनतेने निवडून द्यावे असे आवाहन शिवसेना एकनाथ शिंदे गटाचे नगराध्यक्ष पदाचे उमेदवार अनिल ठाकुर यांनी घेतलेल्या पत्रकार परिषदेत केले. पत्रकार परिषदेस संबोधित करतांना ते म्हणाले, प्रस्थापितांना मी कधीही शरण जाणार नाही. कोणत्याही कुठल्याही परिस्थितीत पुसद शहराच्या जनतेच्या विश्वासाला तडा जाऊ देणार नाही. माझ्याकडुन कोणतीही चूक झाल्यास स्टॅम्प पेपरवर लिहून दिलेला राजीनाम जिल्हाधिकारी यांचेकडे सादर करावा. त्याकरीता मी कोणताही आक्षेप घेणार नाही असे पत्रकारांना माहिती देतांना म्हणाले. सर्व पक्षाच्या उमेदवारांपेक्षा माझ्या उमेदवारीला पुसदची जनता निश्चितपणे प्रतिसाद देणार आहे असे अनिल ठाकुर म्हणाले.
