चतुर्थ श्रेणीचा दर्जा मिळावा या मागणीसाठी विदर्भ महसूल सेवक संघटना शाखा पुसदच्या वतीने एकदिवसीय कामबंद धरणे आंदोलन!
पुसद : महसूल सेवकांना चतुर्थ श्रेणीचा दर्जा मिळावा तसेच विविध मागण्यासाठी आज विदर्भ महसूल सेवक संघटना शाखा पुसदच्या वतीने एकदिवसीय कामबंद धरणे आंदोलन करण्यात आले व विविध मागण्यांचे निवेदन पुसद तहसीलदारा मार्फत शासनाला देण्यात आले आहे .
याबाबत सविस्तर माहिती अशी की,महसूल विभागातील महत्त्वाचा दुवा समजला जाणारा हा महसूल सेवक आहे. महाराष्ट्र राज्याची विविध शासकीय धोरणे, उपाययोजना शासन स्तरापासून ते गाव पातळीवरील महत्त्वाच्या योजना इत्यादीची अंमलबजावणी राज्यातील अंतिम घटकापर्यंत व्यवस्थितरीत्या पोहोचविण्याचे कार्य राज्यातील महसूल सेवक करीत आहे. परंतु शासनाने महसूल सेवकांना अद्याप चतुर्थ श्रेणी दर्जा दिलेला नाही. त्यामुळे महसूल सेवकावर अन्याय केला जात आहे, या संदर्भात विदर्भ महसूल सेवक संघटना शाखा पुसदच्या वतीने शासनाकडे वारंवार निवेदन देऊन सुद्धा राज्य शासनाने किंवा महसूल मंत्र्यांनी यांच्या मागण्याची दखल घेतली नाही त्यामुळे विदर्भ महसूल सेवक संघटनेच्या वतीने दि.१२ सप्टेंबर २०२५ रोजी कामबंद आंदोलन पुकारल्याचे जाहीर केल्यामुळे आम्ही विदर्भ महसूल सेवक संघटना आणि शाखा पुसदच्या वतीने या आंदोलनाला पुर्णपणे पाठिंबा देणार आहेत तर पुसद महसूल सेवक तालुक्याच्या वतीने या आंदोलनात सहभागी होणारा आहेत त्यामुळे संबंधित शासनाने महसूल सेवकांच्या मागण्याची तात्काळ दखल घेऊन या महसूल सेवकांना चतुर्थ श्रेणीचा दर्जा द्यावा अशी मागणी करण्यात आली असल्याचे निवेदन आज ९ सप्टेंबर २०२५ रोजी पुसद तहसीलदार यांच्या मार्फत शासनाला देण्यात आले आहे. या निवेदनावर विदर्भ महसूल सेवक संघटना शाखा पुसदचे तालुका अध्यक्ष सागर गोरे, उपाध्यक्ष रोहन बिडकर, सचिव ज्ञानेश्वर रेणके, अमोल चव्हाण, स्वप्नील काळे, वैशाली राठोड, छाया जाधव, वर्षा पांडे, संध्या भुरे, सुवर्णा राऊत,अदि महसूल सेवकाच्या स्वाक्षरी असल्याची माहिती झेप न्युजशी बोलताना महसूल सेवक संघटनेच्या पदाधिकाऱ्यांनी दिली.
